KATOLIKO AKO!

Ang pagiging isang Katoliko ay naging bahagi na ng aking buhay. Simula't sapul ng ako ay nagkaisip, ay pinalaki na ako ng aking mga magulang na may takot sa Diyos at maging sa katuruan ng simbahan.

Ngunit may mga pagkakataon namang tinatanong ko naman ang aking pananampalataya at ang kakayahan ng simbahan dahil sa dami ng mga atakeng naririnig ko. Mula sa simple hanggang sa complex na mga katanungan na ang mga payak na katoliko ay mapapaisip talaga kung tama ba naman ang turo ng simbahan.


Mga tanong na dapat nating hanapan ng kasagutan. Hindi naman dapat siguro na dahil narinig mo lang ang mga atake sa simbahan galing sa mga maling tagapagsalaysay ay mawawala ka na sa paniniwala o panghihinaan ka na ng paniniwala. Dapat ang mga tanong ay masagot ng tao mula mismo sa loob at hindi sa labas ng simbahan.

Halimbawa na lang, kung magtatanong ka tungkol sa pamilya ng taong gusto mo, tatanungin mo ba yung walang alam sa pamilyang yaon? Siyempre, magtatanong ka sa tao mismo. Ika nga, get it straight from the person.

Ngunit bakit nga ba marami ang umaatake sa katolesismo at mga mananampalatayang umaalis dito na ayon man sa isang SWS survey na ginawa noong Pebrero, 2013, ay isa sa bawat 10 katoliko ay nag iisip na umalis sa pananampalataya.

Bakit nga ba nangyayari ito? Ito ay dahil sa sekyularismo na ang ibig sabihin ay walang pakialam ang batas ng Diyos sa batas ng tao. Separation of church and state. Ito ay dahil sa mga taong pursegidong ibagsak ang simbahan na nakatayo na sa loob ng 2,000 taon. Ito ay dahil sa mahinang katesismo na ginagawa ng simbahan mismo.

Sa blog po na ito nawa'y ating malaman ang mga sagot kahit sa simpleng pangungusap lamang po ang mga katuruan ng simbahang Katoliko. Sana po ay maglaan tayo ng ilang minuto sa pagbabasa at mapagnilaynilayan po natin ito. Sana po ay maunawaan natin kahit na konte mula mismo sa isang batang katoliko ang turo, katuruan at ang kasaysayan ng ating mahal na simbahan.


Maraming salamat po

Lester